Bonjour Belgique: 2 MOIS

19.10.: es chunnt mer wie geschter vor, wo min gastvater zu mir gseit hät; sophie, scho en monet da. und hüt mittag hät's gheisse; sophie, scho zwei mönet da, d'zit vergaht doch viel z'schnell.
und da han ich ihm nur chönne rächt gä! : )

ich weiss ich sött wiedermal öppis schriebe, aber ich chume fascht nöd dezue. Also da isch scho alles anderscht, neu und super, aber irgendwenn wird das halt au alles zum alltag und ich gange halt wie alli andere au id schuel, chume hei, mache mini ufzgi, spiele klavier, mache föteli, gang mängmal go tschoggä, bache guetzli woni denn id schuel mitnime, wo sich alli freued. wenni am morge chume und sege ich han gueztli bache denn giz grad ei ufregig und ich chume als gägeleischtig meischtens ihri znünis über damit sie mini guetzli chönnd ässe. (=
Ide schuel laufts echt super. Ich bin bi allne Lehrer mega beliebt und es vergaht kein tag ohni, dass ich globt wird.. ich han öppe di besser pünkt ide prüefig als d'belgier und ich mache fortschrit vo tag zu tag..
ich han jetzt au scho mis erschte französische buech fertig. aber bald isch ja scho de erschti abschnitt vo mim belgische schueljahr verbi. nächscht wuche chumi mis erschte bulltin (zügnis) über und nachher hämmer endlich mal ferie. ide schuel find ich mich jetzt ohni problem z'recht und ich känne viel lüt, bin nie ellei. S'schönscht a belgie isch aber eifach d'sunne, egal öb am morge früeh wenn mer mitem auto id schuel fahred, oder mir ide erschte schtund ide klass sitzed und plötzlich s'ganze zimmer volle sunnestrahle isch, oder ich am abig em sunneuntergang entgäge tschogge und und und.. ich chum nöd gnueg devo über.
abgseh vo de sunne isches da aber echt chalt. und d'schuel isch alt und ide meischte zimmer häts kei heizig oder d'isolation isch so schlächt, dasses chelter isch als verusse, will'd sunne nöd innechunnt. so sitzemer meischtens mit jagge und chappe da und schriebend schlotternd.. ich freue mich ja scho uf de winter (je rigole)

abgseh vode schuel hani e super neuigkeit: ich chan nämlich jetzt endlich endlich mit minere belgische mannschaft go mätch spiele. und mis erschte spiel isch scho am sunntig!! : D

und eus isch e jungi chatz zueglofe, die isch so herzig. ich han sie därfe taufe und sie heisst jetzt Mikesch. am afang händ all ziemlich schwierigkeite gha mitem name uszschpräche, aber mittlerwile gaz. ; )

Ich glaube das wär's denn wieder mal für de moment.