automne

De summer gaht z'end und de herbscht chunnt..

und d'zit lauft.. unweigerlich. tick--tack--tick--tack-

De herbscht isch schön wie nüt da. überall flüged farbigi bletter ume und d'sunne schint vo tag zu tag flächer über di viele fälder und zauberet e goldigi stimmig is land. 

de warm wind blast der d'haare is -und es lächle ufs gsicht. 

ide pause iss ich öpfel usem garte und nach de schuel ässemer trube, nüsse und trinked tee. 

zum z'nacht git's feini suppe. (!)

& am wuchenend bach ich en chueche.

d'täg vergönd, ohni das ich's merke. alles wird zum alltag. 

ich spiele klavier, ich spiele fuessball, ich gange id schuel, ich chume hei, ich lache und ich redä, ich mache ufzgi, ich bringe minere kollegin dütsch bi. 

ich lerne schnell und ich vergisse di einte dütsche wörte. 

am mäntig hämmer visite médical gha, dass heisst ich bin gsund und [ich gib's ja zue] ich han au chli zuegno. 

am zieschtig hämmer e üebig für wenn's mal würd bränne gha, ufem heiwäg hämmer mitem auto en uffahr unfall gha.. zum glück isch niemert ersthaft verletz worde, und am abig bin ich im theater gsi.

am mittwuch bini mitem velo zu de katharina gfahre über di wite fälder dur de herbscht. es isch echt super wie ich eifach mitem velo irgendwo hi chan fahre. 

am dunnschtig isch de photograph id schuel cho zum einzelföteli mache, ich han min erschte französische text vor de ganze klass vorgläse und chreftige applaus übercho. [ich bin würkli stolz gsi]

aber han leider au e matheprüefig völlig verhaue und binere gschichtsprüefig en wald gmalt anstatt e holzmur. ; ) 

am wuchenend hani mängisch träffe mit de AFSler und ich bin öppe in Namur. 

es isch irgendwie würkli schwär da öppis z'schriebe, will ich weiss nie was. es passiert so viel und ich han kei ahnig was ich genau vo dem allem söll schribä. 

ich probiere eifach irgendwie z'zeige wie's da momentan so lauft, aber das isch nöd so eifach, will es isch irgendwie ziemlich unbeschrieblich!

D'accord. je vous souhaites un l'automne vraiment génial et à bientôt!