1 MOIS

Sit mim letschte Bolggitrag isch zwar nöd grad würkli viel zit vergange, aber irgendwie hani trotzdem s'gfühl, ich muess hüt no öppis schribe. und zwar bini hüt genau en Monet in Belgie. und wahrschindlich isch das völlig normal, aber für mich doch überraschend das d'zit esooo schnell verbi gange isch. und no viel krässer isch, das ich i nur eim monet so viel erläbt und so viel neui lüt kenneglernt han. ihr sind wahrschinlich nöd würkli überrascht, dass isch das schribe, aber für mich isches echt überwältigend. vorallem wenn ich dra denke, dass für es paar vo mine kollegine jetzt scho en drittel vo ihrere zit in belgie verbi isch.. Für mich isches zwar erscht en 10tel [ ;) ] aber trotzdem, ich wär jez unglaublich trurig, wenn ich wüsst, dass ich i zwei mönet scho wieder hei müesst.
ich denke ein monet, isch so e zit, wo mer viellicht nonig richitg zu me belgier worde isch, aber jetzt weiss ich bi ziemlich allem wie's lauft. ich weiss wenn ich am morge muess ufstah, ich weiss de wäg id schuel, ich weiss a wellä tisch ich ide mittagspause muess sitze, dass ich nachher mini kollege triffä, und es git scho es paar lüt, womer würkli as herz gwachse sind (!). ich weiss wo mini schuelzimmer sind, ich weiss was ich i  mis journal de classe muess schriebe, ich weiss welli lehrer nett sind und welli blöd, ich weiss wo ich muess ufpass, wo ich viel muess lerne, wo garnüt. ich weiss das de diego und de julien nach de schuel immer uf mich wartet und ich weiss uf welläm parkplatz mir abgholt wärdet, ich weiss dass nach de schuel immer stau isch und ich weiss das wenn ich heichum es feins gouter [z'vieri] uf mich wartet. ich weiss wie mer d'händ muess richtig positioniere zum klavierspilä, ich weiss dä wäg vom bahnhof zu mim hus, ich weiss wie mer billet löst und ich weiss wo sich d'sache i de chuchi befinded. ich weiss das ich dihei immer hilf für d'schuel überchume wenn ich bruche und ich weiss, dass de noah, de hund, mich immer freudig erwartet und ich weiss, dass wenn am morge de himmel grau isch, s'schön wird und das kei wulche sind. ich weiss sehr viel.
und es git so chlini sache wo langsam zum dihei werdet, wie s'belgische radio, wo eigentlich immer lauft, s'quitsche vo de WC-tür, und de gruch vom wöschmittel.

also jetzt hani viel gschriebe ohni witere sinn; also eigentlich hani wellä säge, es gaht mer guet und ich bin z'friede nach em erschte monet, und es tuet mer leid wenn ich mich nöd allzuviel mälde, will es isch meischtens recht viel los, und ich redä nonig so guet französisch, aber es isch mer jez doch meh oder weniger schwär gfalle, de text z'schribä. im übrige will ich eu eifach no säge: GNÜSSED JEDÄ MOMENT.  LÄBED I JEDEM MOMENT. D'ZIT GAHT VIEL Z'SCHNELL VERBI!

 Journal de classe [so gseht mini schuelwuche us]

 Belgier händ würkli würkli viieeel ferie. alles was so grau isch, heisst congé!! : D

Séminaire de Floreffe

 Journal de classe uf de rücksite ; )

 Ich nacheme Monet Belgie

 beschti und luschtigschti chatz [die chasch sogar ade bei uflupfe und sie hät's gärn..

Morge am 8i ufem wäg id schuel. : ) [handyqualität]

à bientôt!